Welkom by Huis Jacomé Laubscher
Paarl Gimnasium se Graad 8-meisieskoshuis
Paarl Gimnasium se Graad 8-meisieskoshuis
Huis Jacomé Laubscher is vernoem na ’n buitengewone meisie wat ’n blywende impak op almal rondom haar gehad het. Sy het die ware betekenis van die Gimnasium-gees geleef, ondanks uitdagings.
Paarl Gimnasium het die graad 8-meisieskoshuis na Jacomé vernoem as erkenning vir haar indrukwekkende bydrae tot die skoolgemeenskap. Jacomé se nalatenskap leef voort in die koshuis wat haar naam dra en die meisies inspireer om dieselfde waardes na te streef.
Paarl Gimnasium het die nuwe graad 8-meisieskoshuis na Jacomé vernoem. Waarom? Al was sy “net ’n gewone mens,” het sy ’n buitengewone impak op almal rondom haar gehad. Jacomé was ’n ware vriendin en ’n trotse Gimmie. Sy het ’n positiewe verskil in ander se lewens gemaak en, ondanks ernstige uitdagings, ’n merkwaardige ingesteldheid gehandhaaf. Sy is met gloukoom gebore en moes gevolglik voor in die klas sit. Sy was nie een van die “cool kinders” nie, maar het tog kompeterend aan sport deelgeneem en altyd haar beste gegee. Sy het 58 oogoperasies in 41 jaar ondergaan, maar haar dankbaarheid en optimisme het nooit gewankel nie. Met haar sprankelende persoonlikheid het sy mense altyd beter oor hulself laat voel — sy het elke plek beter gelos as wat sy dit gekry het.
Haar nalatenskap leef voort in die nuwe koshuis wat tans 16 graad 8-dogters huisves. Die koshuisdogters skakel in by Huis Kalahari Visser, wat self ’n ryke geskiedenis het wat diep verweef is met Gimnasium se storie.
Die hoofgebou se bouwerk het in 1933 begin, en volgens skoolhoof JFM Kriel se jaarverslag van daardie jaar, was dit ’n groot voorreg om die aanvang van ’n koshuis te sien wat “sestig seuns sal huisves en tot ’n sieraad vir ons skool en stad sal strek.” Die koshuis was reeds in 1934 voltooi — sierlik, smaakvol en doeltreffend gemeubileer — teen ’n boukoste van sewe duisend pond (R14 000). Die eerste huisouers was die legendariese mnr. JGL (“Pappa”) Slabbert en sy gade. ’n Anneks is in 1938 bygevoeg. Teen die einde van 1971 is die koshuis ontruim en Huis McFarlane het in 1972 geopen.
Vanaf 1972 tot 2004 het die oorspronklike koshuis onder Hoërskool Labori se bestuur geval en was bekend as Huis Robert Möhr. Met Labori se nuwe koshuise in gebruik, het die gebou in onbruik geraak, waarna Gimnasium dit in 2004 — ná jaarlange onderhandelinge met die WKOD — toegeken is. Herstelwerk en verbouings is onmiddellik aangepak, en die koshuis is in 2006 amptelik as Gimnasium se graad 8-koshuis heropen onder die nuwe naam Huis Kalahari Visser, vernoem na mnr. Johan Visser, ’n oudstudent en weldoener van die skool.
Vandag is daar reeds kleinkinders van die Laubscher-familie in Gim, met die oudste wat volgende jaar matrikuleer — die nalatenskap gaan dus steeds voort en versterk die betekenis van die koshuis se naam.
